Беларус киноси вакилларидан иборат делегация Тошкентга келди
Шу кунларда мамлакатимизда Президентимизнинг тегишли қарорига асосан жорий йилнинг 28 сентябрдан 3 октябрга қадар Ўзбекистоннинг бир қатор шаҳарларида ўштказилиши кутилаётган “Ипак йўли дурдонаси” XIII Тошкент халқаро кинофестивалига қизғин тайёргарлик ишлари кетмоқда.
Ёшларнинг истеъдодини намоён этишга қаратилган, янги, ёрқин ва инновацион форматда ўтказилиши режалаштирилган халқаро кинофестивалга дунёнинг 50 дан зиёд мамлакатидан 400 нафардан зиёд киноижодкорлар ташрифи кутилмоқда.
Айни пайтда “Ипак йўли дурдонаси” номи билан “Тинчлик, маърифат ва тараққиёт” шиори остида бўлиб ўтадиган кинофестивал муносабати билан хориж кино соҳасининг нуфузли намояндаларининг юртимизга ташрифи бошланди.
Хусусан, машҳур кино ижодкорларидан иборат Беларусь Республикаси делегацияси Ўзбекистон томони, шу жумладан, “Ўзбектелеком” АКнинг масъул вакиллари томонидан Ислом Каримов номидаги Тошкент Халқаро Aэропортида кутиб олинди. Таъкидлаш жоизки, меҳмонлар икки давлат миллий анъаналарига мувофиқ тарзда самимий қарши олинди.
Самолётдан эндигина тушган меҳмонлар мамлакатимиз ва ХIII Тошкент халқаро кинофестивали ҳақидаги фикрлари билан ўртоқлашди.
– Аввало, Ўзбекистонга ташрифимдан мамнун эканлигимни айтмоқчиман. Бугун юртингизда рўй бераётган ижобий ўзгаришлар дунё аҳлининг эътиборида. Табиийки, ўзбек киноижодкорларининг салоҳияти, фаолиятини ҳам мунтазам кузатиб бораман ва мутахассис сифатида юқори баҳолайман. XIII Тошкент халқаро кинофестивали эса барча эътирофларимнинг исботидир. Бизни юқори даражада кутиб олишди, бунинг учун алоҳида миннатдорлик билдираман, – дейди Россияда хизмат кўрсатган артист Дмитрий Астрахан.
Таъкидлаш жоизки, Беларусь киноижодкорлари томонидан ишланган «Қизалоқ дадасини қидирмоқда» («Девочка ищет отца»), «Оқ шабнамлар» («Белые росы»), «Менинг исмим Арлекино» («Меня зовут Арлекино») каби машҳур фильмлар бутун дунё, шу жумладан, ўзбек кино ихлосмандларининг ҳам эътиборини ўзига жалб қилган. Тадбир доирасида беларуслик кино ижодкорларнинг кинофестиваль номинацияларига киритилган «Уруш. Инсон бўлиб қолмоқ» (“Война. Остаться человеком”), «Қўпорувчи тақдири» (“Судьба диверсанта”), «Прантиш Вирвичнинг саргузаштлари» (“Авантюра Прантиша Вырвича”), «Ўйинчи тақдири» (“Правила геймера”) каби кинокартиналарнинг намойиши бўлиб ўтади.
Эслатиб ўтамиз, 2020 йил давомида «Беларусфильм» киностудияси иштирокида режиссёр Жаҳонгир Аҳмедов томонидан суратга олинган, урушда бешта ўғлидан жудо бўлган Зулфия Зокированинг фожиали тақдири ҳақида ҳикоя қилувчи «Илҳақ» кинофильмининг ҳарбий эпизодлари айнан Беларусь Республикаси ҳудудида суратга олинган.
UZTELECOM – “Ипак йўли дурдонаси" ХIII Тошкент халқаро кинофестивали ҳамкори!