Muxbir Daliyev Телеграм-каналида ёритилган мурожаатга оид муносабат
Шахси очиқланмаган ва боғланиш учун бирор манба қолдирилмаган ушбу мурожаатда фуқаронинг 150 000 сўмлик ойлик интернет пакетидан фойдаланиши, бироқ рақами турли хизмат обуналарга уланиб қолаётганлиги ва ҳисобидан ортиқча маблағ ечиб олинаётганлигидан шикоят қилганлиги келтирилган.
Мазкур мурожаат бўйича Компания Ахборот хизмати томонидан ўрганиш ишлари амалга оширилиб, қуйидагилар маълум қилинади:
Авваламбор, ушбу мурожаат учун миннатдорлик билдирмоқчимиз! Сабаби, шу каби ижтимоий тармоқлардаги чиқишлар натижасида Компаниямиз фаолиятини янада мувофиқлаштириш, абонентларимиз учун кўрсатилаётган хизматлар сифати ва кўламини ошириш имкони яратилади. Мурожаат бўйича эса абонентларимизга бирор бир контент-хизматидан маълум бир муддат бепул фойдаланиш акцияси доирасида уланишдан аввал, кейинчалик бу хизмат пуллик бўлишини эсдан чиқармасликларини эслатиб ўтамиз! Бироқ, ҳар қандай хизматга уланиш вақтида абонентдан пул маблағлари ечилмайди. Чунки контент-провайдерлар UZTELECOM мобил алоқа хизмати абонентларига сервис билан танишиш учун 24 соат мобайнида обунани бепул тақдим этади. Одатда бу каби хизматлардан кирувчи SMS хабарлар баъзи ҳолатларда SPAM папкасига тушиши ҳамда абонент назаридан четда қолиши мумкин. Бунинг учун тез-тез SPAM папкасини текшириб туришингизни сўраб қоламиз! Шунингдек, UZTELECOM мобил алоқа хизмати контент-провайдерларининг ахборот-кўнгилочар (контент) хизматлари мавжуд бўлиб, уларга абонент фақат ўз ихтиёрига кўра уланиши мумкин. Мобил оператор томонидан абонентларнинг хоҳишисиз ҳеч қандай контент хизматлари автоматик тарзда уланмайди ва бунга йўл қўйилмайди!
- IVR қўнғироғи орқали обуна бўлганда – IVR менюсига қўнғироқ қилганда, абонентга хизмат шартлари ва нархини билдирувчи обуна таклиф қилинади, менюда кўрсатилган махсус тугма ёрдамида амалга ошириш мумкин. Тугмани босиш абонентнинг розилиги ҳисобланади ва хизмат ёқилади. Шундан сўнг, абонентга хизмат шартлари, обунани бекор қилиш усуллари кўрсатилган обуна тўғрисида SMS-хабар юборилади.
- SMS-хабар юбориш орқали обуна бўлганда, хизматни фаоллаштирадиган сўз ёки рақам билан ушбу хизматнинг қисқа рақамига абонентдан SMS юбориш орқали хизматларга обуна бўлиш мумкин. Хизматни фаоллаштириш учун тўғри SMS хабарни юбориш – абонентнинг розилиги ҳисобланади. Шундан сўнг, абонентга хизмат шартлари, обунани бекор қилиш усуллари кўрсатилган обуна тўғрисида SMS-хабар юборилади.
- USSD менюсидан фойдаланиш – USSD менюсига киришда сиз хизматга обуна бўлишингиз мумкин бўлган элемент пайдо бўлади. Бу элемент танланганида обуна шартлари кейинги босқичда обуначини тасдиқлаш билан тавсифланади. Шундан сўнг, абонентга хизмат шартлари, обунани бекор қилиш усуллари кўрсатилган обуна тўғрисида SMS-хабар юборилади.
Хизматларга обунани бекор қилиш усуллари:
Шикоятларни камайтириш, шунингдек, абонентларга контент хизматларидан обунани бекор қилиш учун шарт-шароит яратиш мақсадида, алоқани узишнинг қуйидаги усуллари мавжуд:
- SMS орқали – STOP1 буйруғини уланган хизматнинг қисқа рақамига юборилган ҳолатда уланган хизматни ўчириш мумкин;
- USSD орқали – *199# териб қўнғироқ тугмачасини босганда барча Контент хизматларини ўчириш учун;
- IVR-меню орқали – 1099 қисқа рақамга қўнғироқ қилиб 8 бўлимни танлаганда (яқин орада 6 бўлимга ўтқазилиши кутилмоқда);
Бундан ташқари, UZTELECOM мобил алоқа хизмати орқали ахборот-кўнгилочар (контент) хизматларини кўрсатувчи контент-провайдерларнинг тўлиқ рўйхати ва хизмат турлари ҳамда уларни тўхтатиш учун Stop сўзлар ҳамда тегишли буйруқни жўнатиш учун қисқа рақамли SMS манзиллари билан ушбу ҳавола орқали танишишингиз мумкин.
Шуни ҳам таъкидлаш жоизки, Landing page (веб-саҳифа) орқали хизматларни фаоллаштирган ва 10 кун давомида хизматдан фойдаланмаган абонентларга ушбу хизмат фаол бўлганлиги тўғрисида SMS-хабар келади.
UZTELECOM миллий оператори ҳар бир абонентини қадрлайди ва энг қулай ва хамёнбоп хизматларни тақдим этишда давом этади!